इजरायली प्रधानमन्त्रीले पहिलो पटक यूएईको औपचारिक भ्रमण गर्ने

युएई । इजरायलका प्रधानमन्त्री बेन्जामिन नेतान्याहुँले पहिलो पटक युनाइटेड अरब इमिरेट्स (यूएई)को औपचारिक भ्रमण गर्ने भएका छन् । दुई देशका बीचमा आपसी सम्बन्धलाई सुधार गर्दै अगाडि बढ्ने सहमति भएकाले बिहीबार उनले यूएईको भ्रमण गर्ने भएका हुन् ।

नेतन्याहुको एक जना उच्च सरकारी अधिकारीले उनको भ्रमण निश्चित भएको जानकारी दिएको स्थानीय सञ्चारमाध्यमहरूले उल्लेख गरेका छन् । उनले यसअघि नै यूएई सँगै बहराइनको भ्रमण गर्ने कार्यतालिका सार्वजनिक भएको थियो । तर को,रोनाभाइरसको महा’मारी फैलिँदै गएपछि इजरायलमा लकडाउन कायमै रहेको र विमान सेवासमेत बन्द भएकाले उनले त्यतिबेलाको भ्रमण स्थगित गरेका थिए ।

“यूएईका राजा र युवराजको मैत्रीपूर्ण निमन्त्रणालाई प्रधानमन्त्री नेतान्याहुले स्वीकार गर्दै भ्रमणमा जान लाग्नु भएको हो, भ्रमण दुई देशबीचको सम्बन्धका लागि महत्वपूर्ण हुने अपेक्षा पनि गरिएको छ,” नेतन्याहुको कार्यालयका एक उच्च अधिकारीले भनेका छन् ।                                             

सन् २००९ देखि लगातार इजरायली राजनीतिको केन्द्रमा रहनु भएका नेतन्याहुको भ्रमणलाई विश्वभरबाट महत्व र चासोका साथ हेरिएको छ ।

भ्रमणका क्रममा उनले यूएईका नेता शेख मोहम्मद बिन जायद अल नाह्यानलाई अबुधाबी विमानस्थलमा भेट्नेछन् । उनले जेरुसलेम फर्केपछि हङ्गेरीका प्रधानमन्त्री भिक्टर अर्बानसँग भेटवार्ता गर्ने कार्यक्रम तय भएको छ ।

प्रकाशित मिति March 10, 2021