सिन्धुलीमा विमानस्थल बन्दै, आगामी २ वर्षभित्र निर्माण सम्पन्न गर्ने लक्ष्य

सिन्धुली : स्थानीयले माग गरेको झण्डै एक दशकपछि सिन्धुलीमा विमानस्थल बन्ने भएको छ। जिल्लाको कमलामाई नगरपालिका- ८ को कल्याणी मन्दिर नजिकै विमानस्थाल निर्माणका लागि नेपाल नागरिक उड्यान प्राधिकरणले पहिलो चरणको सम्भाव्यत्ता अध्ययन पूरा गरेपछि विमानस्थल बन्ने पक्‍का भएको हो।

फाइल तस्बिर

प्राधिकरणका म्यानेजर तथा सिनियर इन्जिनियर नलविक्रम थापाका अनुसार सिन्धुली विमानस्थल निर्माणका लागि पहिलो चरणको अध्ययन तथा प्राविधिकरुपमा डिटेल प्रोजेक्ट रिपोर्ट (डिपीआर) तयार गर्ने कार्य सम्पन्न भएको छ।

कमलामाई नगरपालिका ८ को करकरे र सिस्नेरीको बीचमा पर्ने कल्याणी मन्दिर नजिकै १ हजार ४ सय ४२ रोपनी १३ आना २ पैसा १ दामको ७ लाख ३४ हजार ३८ स्क्वायर मिटर क्षेत्रफलमा विमानस्थान निर्माणका लागि डीपीआर तयार पारिएको हो।

फाइल तस्बिर

आर्किटेक्ट्स इन्जिनियर्स, प्लानर्स एन्ड प्रोजेक्ट म्यानेजमेन्ट कन्सल्टेन्ट्स नेपालले विमानस्थलको डीपीआर तयार पारेको हो।त्यसको अध्ययन गरी केही प्राविधिक कुरा मिलाउने काम भइरहेको छ।अब छिट्टै वातावरण प्रभाव मुल्यांकन (इआईए) गरेर विमानस्थलको निर्माण कार्य सुरु गरिने छ,’ इन्जिनियर थापाले भने।

इआईए रिपोर्ट आएपछि आगामी दुई वर्षभित्र निर्माण सम्पन्न गर्ने गरी १३ प्रतिशत भ्याट, १० प्रतिशत कन्टेन्जेन्सीसहित कुल ९३ करोड ९२ लाख ७८ हजार ३ सय ९८ रुपैयाँ ३५ पैसा विमानस्थल निर्माणको लागत स्टिमेटमा उल्लेख गरिएको इन्जिनियर थापाले उल्लेख गरे। यो विमानस्थलसम्म पुग्ने सडक, रनवे, पार्किङ, स्प्रोन आदीको स्ट्रक्चरको लागत हो।

‘तर, कमला नदी किनारमा विमानस्थल निर्माण गरिने भएकाले कमला नदीको किनारमा वाउन्डरिङ गर्न धेरै रकम खर्च हुने भएकाले कुल लागत बढ्न सक्नेछ,’ उनले भने। सिन्धुली, रामेछाप, ओखलढुङ्गा, काभ्रे, महोत्तरी, धनुषा र उदयपुर जिल्लाका लागि सुविधा पुग्ने गरी निर्माण थालिएको विमानस्थलको डिजाइन यरक्राप्ट ‘एटिआर ७२ डी’ रहेको छ।

‘७२ सिटेसम्म विमान अवतरण तथा उडान गर्न सक्नेगरी १ हजार ७ सय ६० मिटर लामो र ३० मिटर चौडाई भएको धावनमार्ग निर्माण गरिने पनि स्टमेटमा उल्लेख छ।६ सय मिटर लम्बाइ‌को पार्किङ क्षेत्र बनाइने छ,’ थापाले थपे। विमानस्थलको निर्माणका लागि अध्ययन गर्न नेपाल सरकारले ५० लाख रुपैयाँ विनियोजन गरेको थियो।

पूर्व कृषिमन्त्री तथा संघीय संसद हरिबोल गजुरेलको अग्रसरतामा विमानस्थल निर्माणका लागि आवश्यक प्रक्रियाको थालनी भएको थियो। विमानस्थल निर्माणस्थल सिन्धुली सदरमुकाम माढीबाट १२ किलोमिटर तथा भिमान बजारबाट ६ किलोमिटर दूरीको बीचमा वीपी राजमार्गसँग जोडिएको छ।

पूर्व-पश्चिम महेन्द्र राजमार्गअन्तरगत महोत्तरीको बर्दीवासबाट वीपी राजमार्गहुँदै २५ किलोमिटर दूरीमा सिन्धुली विमानस्थलमा आउन सकिन्छ भने मध्यपहाडी लोकमार्ग तथा वीपी राजमार्गहुँदै ३२ किलोमिटर दूरीमा रामेछापबाट आइपुगिन्छ।

फाइल तस्बिर

सिन्धुली विमानस्थलबाट सिमरा विमानस्थलसम्म ९५ किलोमिटर, काठमाडौंस्थित त्रिभुवन अन्तर्राष्ट्रिय विमानस्थल ८५ किलोमिटर र लुक्ला विमानस्थल ९९ किलोमिटर दूरीमा पर्दछ। जिल्लामा विमानस्थल बन्ने भएपछि स्थानीय भने निक्कै उत्साहित भएका छन्।

सिन्धुली जिल्लाहुँदै राजधानी काठमाडौं तथा मध्य तराईका साथै पूर्वी र मध्यपहाडी जिल्ला जोड्ने चार ठूला राजमार्ग निर्माण भएपछि जिल्लामा स्थानीयले विमानस्थल निर्माण गर्नुपर्ने माग गर्दै आएका थिए।

बनेपा-बर्दीवास वीपी राजमार्ग, मध्येपहाडी लोकमार्ग, धरान-चतरा तथा मदनभण्डारी लोकमार्ग जिल्लाहुँदै निर्माण भएका छन् । यी राजमार्गमा हुने सवारी दुर्घटना र राज्यका भीआपी तथा भीभीआइपीदेखि आन्तरिक तथा बाह्य पर्यटकको आवतजावतमा समेत विमानस्थल निर्माण भएपछि सहज हुने भएको छ। यस विमानस्थल निर्माणपछि सोलु तथा लुक्लासम्म जाने आउने पर्यटकका लागि सिन्धुलीबाट एक उपयुक्त गन्तव्य हुने पनि अनुमान गरिएको छ।

ऐतिहासिक सिन्धुलीगढीमा नेपाली सेनाले राष्ट्रियस्तरको एकिकरण संग्राहलय बनाउने निश्चित भएको छ । सरकारले यसैपालि निर्माण सम्पन्न गर्नेगरी विनियोजन गरेको बजेटबाट नेपाली सेनाले आगामी ९ महिना भित्र संग्राहलय बनाउने जानकारी गराएको हो ।

आज रक्षा मन्त्रालयमा रक्षा तथा उपप्रधानमन्त्री ईश्वर पोखरेल तथा प्रधान सेनापति सिन्धुलीका जनप्रतिनिधिहरु हरिवोल गजुरेल, कमलामाई नगरपालिकाका मेयर खड्ग खत्री, रक्षा सचिव, पर्यटन तथा नागरिक उड्ययन सचिव, नेपाली सेनाका जनरलहरुलाई बर्दबहिनी गणका गणपति राजीव थापालेयुद्ध संग्राहलयको परियोजनाबारे बिस्तृत विवरण पेश गर्नुभएको थियो । हिजो यस बिषयमा कमलामाई नगरपालिका प्रमुख खत्रीले प्रधान सेनापति संग सैनिक मुख्यालयमा लामो छ्लफल छलफल गरेका थिए ।

समग्र अध्ययन पश्चात रक्षामन्त्री पोखरेलले उक्त परियोजना स्वीकृत गर्नुभएको छ । रक्षा मन्त्री पोखरेलले यो महत्वपूर्ण र दुर्लभ अवसरलाई समयमै सम्पन्न गरी सिन्धुलीको मात्र नभइ समग्र राष्ट्रको लागि योगदान गर्ने अवसर सिन्धुलीलाई मिलेको बताउनु भयो । उक्त कार्यक्रममा संग्राहलयको डिजाइन सहित निर्माण गरिएको थ्रीडी म्यापिङ एनिमेशेन भिडियो पनि देखाइएको थियो । ग्राहलयको नक्सांकन, डिजाईन पुरातत्व विज्ञहरु सम्मिलित काठमाण्डौं स्थित मेगा सिभिल कन्सल्टेन्ट प्राईभेट लिमिटेडले तयार पारेको हो । मेगाले यस अघि लिग लिगकोट दरबारमा निर्माणाधिन संग्राहलयको नक्सांकन डिजाईन गरिसकेको छ । करिब ४९.२० बर्ग फिट क्षेत्रफलमा ६ कोठे एक तल्ले संग्राहलयको कुल लागत ४ करोड ५० लाख रुँपैया स्टेमेट गरिएको छ । संग्राहलयको आन्तरिक संरचनाहरु अनुसार लागत बढ्न सक्नेछ ।

संग्राहलय भित्र वृत चित्र मार्फत गढीको ऐतिहासिक सामरिक महत्व प्रर्दशन गर्न सकिने थिएटर, तत्कालिन समयमा घरेलु सेनाले प्रयोग गरेका हात हतियार, तोप, गोला, तत्कालिन युद्ध’कालिन समयमा घरेलु सेना र बिपक्षी सेनाको पोशाक प्रर्दशनका लागि काष्टेरिया, गढी अवलोकनका लागि आउने आन्तरिक वा पर्यटक एवंम अवलोकनकर्ताहरुले उपहार स्वरुप लान सक्ने बस्तुहरु उपलब्ध सोभनियर कक्ष लगायत रहने छन् ।

सिन्धुलीको बर्दबहिनी गण र ९ नं. बाहिनीले संयुक्त रुपमा संग्राहलय निर्माणको जिम्मा पाएको छ ।

 

प्रकाशित मिति November 19, 2019
Loading...