गोकुल बास्कोटालाई चोख्याएर फेरि मन्त्री बनाउने तयारी

काठमाडौं, भदौ २१ । ७० करोड कमिशन मागेको टेप प्रकरणमा मुछिएका पूर्व सञ्चारमन्त्री गोकुलप्रसाद बास्कोटालाई फेरि मन्त्री बनाउने तयारी भएको छ । उनलाई सेक्युरिटी प्रिन्टिङ प्रेस खरिदको घुसको मोलमोलाईको टेप प्रकरणमा चोख्याएर मन्त्री बनाउनकै लागि प्रधानमन्त्री केपी शर्मा ओलीले मन्त्रिमण्डल पुर्नगठनलाई केही समय पछि धकेलेको बुझिएको छ ।

बास्कोटा टेपप्रकरणमा चोख्खिएलगत्तै पुनः मन्त्री बन्ने विश्वस्त स्रोतले जानकारी दिएको छ । यसैका लागि योजनावद्ध तरिकाले प्रक्रिया बढेको छ ।

बास्कोटाको टेपप्रकरणमा अख्तियार दुरुपयोग अनुसन्धान आयोगले विजयप्रकाश मिश्रलाई सात दिनभित्र टेपको डिभाइस लिएर उपस्थित हुन पत्र लेखेको छ । तर, मिश्रले एक साताभित्र आउन नसक्ने जानकारी गराइसकेका छन् । को रो ना भा इरसको सं क्रमणका कारण चाटर्ड फ्लाइट मात्र भएकाले आफू एक हप्ताभित्र आउन नसक्ने बताए ।

‘टेपको अडियो मात्र होइन मसँग भिडियो पनि छ अख्तियारलाई बुझाउँछु,’ उनले ऋषि धमलासँगको अन्तवार्तामा भने, ‘रेकर्ड गरेको छोरीको फोन जापान भएकाले त्यो लिन आएको हुँ ।’ जापानमा रहेका मिश्र सात दिनभित्र अनुपस्थित भएमा बास्कोटाको विषय अगाडि नबढ्ने र बास्कोटा चोख्खिने अवस्था बन्न सक्छ ।

मिश्रले आफू जापानमा रहेकाले आउन समय लाग्ने भनिसकेका छन् । उनले आफूसँग टेपको सामाग्री समेत रहेको दाबी गरेका छन् । अडियो मात्र नभई भिडियो टेप रेकर्ड पनि रहेको मिश्रको दाबी छ । तर, उनले भिडियो सार्वजनिक गरेका छैनन् । उक्त भिडियो नेपाल आउने वित्तिकै अख्तिारलाई बुझाउने समेत बताए । उनले भने, ‘भिडियोमा प्रष्ट छ कुनै क्यारिकेचर छैन ।’

यसैगरी, मिश्रले आफू अख्तियारको सम्पर्कमा रहेको बताएका छन् । आफू जापान न’भागेको उनको दाबी छ । ‘अनुसन्धान अधिकृत प्रवीण पोखरेल सम्पर्कमा हुनुहुन्थ्यो,’ मिश्रले भने, ‘मैंले अख्तियारमा दुईवटा निवेदन हालेको छु ।’ रिपोर्टसनेपालबाट ।

काठमाडौंट्वान्टिफोर डट कममा प्रकाशित सामग्रीबारे तपाईसंग कुनै सुझाव, सूचना तथा गुनासो भए हामीलाई kathmandu24online@gmail.com मा पठाउन सक्नुहुनेछ। धन्यवाद ।

प्रकाशित मिति September 6, 2020